മനസാ ശിരസാ നമിക്കുന്നു

"അച്ഛാ, ഇതാ എന്റെ മലയാളം ബുക്ക്‌"
അപ്പു കൊണ്ടുവന്നപ്പോള്‍ ഒന്ന്‌ തുറന്നു നോക്കി
"അപ്പൂ, ഇതച്ഛന്‍ പഠിച്ചതാ."
"ദൈവമേ കൈതൊഴാം, കേള്‍ക്കുമാറാകണേ..."
ആദ്യത്തെ പാഠം തന്നെ നീട്ടി ചൊല്ലിക്കൊടുത്തു

ഉടന്‍ വന്നൂ ഒരു ചോദ്യം:
"അതിനച്ഛന്‍ മലയാളം പഠിച്ചിട്ടുണ്ടൊ?"
കുഴഞ്ഞ്‌ പോയല്ലോ എന്തുപറയണം?
വാക്കുകള്‍ വിഴുങ്ങി. ഓര്‍ത്തുപോയി

"കല്ലിടുമ്പിലെ വെള്ളമ്പോലെ പാട്ടല്ലെ വരണ്‌, ഹയ്‌ പാട്ടല്ലെ വരണ്‌.."

എന്നുപാടിയ കുഞ്ചീരയെ

"അന്റെ കണക്കനും കാളപൂട്ട്വാരന്‍
എന്റെ കണക്കനു, കാളപൂട്ട്വാരന്‍
പിന്നെന്താ കാളിക്കുട്ട്യേ
നമ്മളുതമ്മില്‌ മിണ്ട്യാലേയ്‌"

എന്നു പാടിയ നീലിയെ

"വല്ല്യേ വല്ല്യേ തമ്പ്രാക്കന്മാര്‍
ചത്തുപോയാലേയ്‌
വല്ല്യേ വല്ല്യേ കുണ്ടംകയ്യില്‌
കഞ്ഞികുടിക്കാലോ"

എന്നു പാടിയ കറുപ്പനെ

നീലമേഘക്കുടനിവര്‍ത്തി..
താലവനത്താലി ചാര്‍ത്തി
മൈക്കാപ്പ്‌ ചൂടി... നില്‍ക്കുന്ന
എന്റെ ഗ്രാമസുന്ദരിയെ

പിന്നെ നിര്‍ത്താതെ ബ്ലോഗ്ഗുന്ന, അരൂപികളായ

ഉമേഷിനെ
ക്ഷുരകനെ
സൂര്യയെ
എവൂരാനെ
പോളിനെ
പെരിങ്ങോടനെ
വിശ്വത്തിനെ
രാത്രിഞ്ചരനെ
'സുധാനില്‍'നെ
പിന്നെ..പിന്നെ
ജന്നത്തുല്‍ ഫിര്‍ദൌസിനെ
...അങ്ങിനെ പലരേയും.


"അച്ഛനോടാ ചോദിച്ചത്‌, അച്ഛനീ പോയം പഠിച്ചിട്ടുണ്ടോ?"

ഹാവൂ രക്ഷപ്പെട്ടു. ചോദ്യം മാറിയല്ലൊ

"ഉവ്വെടാ, അച്ഛനിത്‌ പണ്ട്‌ രാവിലെ ചെല്ലിയിരുന്നതാ"

അതെ,.. പണ്ട്‌, പണ്ടുപണ്ട്‌ ദിനോസറിനും മുന്‍പ്‌.... രണ്ട്‌ ജീവബിന്ദുക്കള്‍ നടക്കാനിറങ്ങുതിനും മുന്‍പ്‌..